سەبری سلێڤانەیی

هنده‌ک ژ ته‌ و هنده‌ک ژ من

سه‌بری سلێڤانی

( 1 )

ئه‌و فێرسێ ب جلێن ره‌ش د مژ و مۆرانا ته‌ ده‌ ( ئه‌زه‌ک) بوو، ژ غه‌زۆ و فتوحاتان ره‌ڤیابوو، رما خوه‌ هاڤێت، خه‌نجه‌را کو چو جار ژ کالانێ ده‌رنه‌خستی‌ شکاند، نه‌وقا مه‌هینا شینبۆز یا چو جار مه‌خه‌ل نه‌هاتی رامویساند، زین و مه‌عرکێن وێ بۆ پێژنا فیرسه‌ک دیل، پشتی ئازادبوونێ، هلگرتن، لغاڤا وێ سست کر، ئه‌ڤجار به‌ر ب تاڤسۆرکێ هاژووت.

( 2 )

به‌ری بمرم:

جار دبووم بازه‌ک و... ل هنداڤ که‌له‌خێ ته‌ دفریم

جار دبووم ده‌روێشه‌ک و... ل دۆر به‌ژنا ته‌ دزڤریم

جار دبووم زاڤایه‌ک شه‌رمین و دبشکوریم

جار ل بن سیها ته‌، دبووم زارۆکه‌ک ساڤا و بێده‌نگ

جارێن دی ژی... دبووم ماره‌ک و... من خوه‌ ل نه‌وقا ته‌ دئالاند

به‌لێ هه‌ر جار،

تو... دبوویه‌ ته‌ڤنپیرکه‌ک.

 ( 3 )

سه‌رێ سالێ هات و

ئه‌ز ژی هاتم

نزانم... چ بو ته‌ بکم دیاری!

ئه‌ز ژ گولێن عاشقان و یاریکێن زارۆکان... حه‌ز دکم،

به‌لێ ژنێن ڤی ولاتی ژ زێر و زیڤی حه‌ز دکن

هه‌می ده‌مان ژن به‌... ژن

ب تنێ ل سه‌رێ سالێ،

ببه عاشق یان زارۆک.

عاشق،

يان زارۆک!

(5)

گاڤا کو ...

ساکۆیێ ژ ره‌نگێ پۆرا ته‌ ل به‌ر دکم،

وه‌ک ده شته‌كا سبى ته‌ دبينم

پرتووکه‌ک نوى دنڤیسم، ته‌ دخوینم

قه‌هوه‌یه‌کا سار ڤه‌دخوم، ته‌ دئالیسم

جگاره‌یه‌کێ هلدکم، ته‌ بێهن دکم

خه‌ونێ دبینم، ته‌ هوندا دکم

ته‌ دبینم، خه‌ونێ هندا دکم

گاڤا کو...

ئه‌ز دبم تو، تو دبی ئه‌ز

ب ئاقل دبم، تو دین دبی

دین دبم، تو ب ئاقل دبی

گاڤا کو...

ئه‌ز دهێم، تو دچی

ئه‌ز دچم، تو دهێی

ئه‌ز دبم هه‌می، تو دبی چو نه‌

ئه‌ز دبم چو نه‌، تو دبی هه‌می

به‌لێ،

گاڤا کو ئه‌ز دبم زه‌لام تو دبی ژن

و گاڤا کو تو دبی ژن،

ب تنێ هینگێ، که‌یفا من دهێت

كو ئه‌ز زه‌لامم... زه‌لام!

(6)

... و هێژ تو دبێژی: "بێ من نه‌مره!‌"
هه‌گه‌ر دیسان ئه‌ز مرم، تکا دکم، مرارییان ل سه‌ر به‌راڤێن خوه‌ نه‌ته‌یسینه‌‌، دایێ مه‌نال ل به‌ر سه‌رێ من نه‌سترینه‌، نه‌نالینه‌. گاڤا من دبن گۆرستانێ، که‌زیێن خوه‌ نه‌ قوسینه‌، به‌لێ ڤه‌هوینه‌ و ل به‌ر بایێ بێهنا به‌ده‌نێ بفرینه‌، مۆمێن میهره‌دارییێ ل هنداڤی کێلا سه‌رێ من هل نه‌که، نه‌بێژه‌ ئه‌ز په‌شێمانم، سیلاڤێن خوه‌ ب سه‌ر بنارێن هشک و هۆلا ده‌ بهه‌رکینه‌‌. ل هه‌ر ئێڤارا ئه‌ینییێ قه‌سیده‌یه‌کێ بنڤیسه‌ و ئه‌ز دێ خوینم... ، شێریناهییان ل زارۆکێن بێ ناسنامه‌ به‌لاڤ بکه‌ و گونه‌ها مه‌ یا مه‌زن بغه‌فرینه‌...

 

عشقا مه،‌

گونه‌ها هه‌ری مه‌زنه‌ د وه‌لاتێ مرنێ ده‌‌،
عشقا مه‌، ته‌ک راستی یه‌ د دیرۆکا جیهادێ ده‌‌،
عشقا مه‌ سه‌رمه‌دی یه‌ سه‌رمه‌دی، د سه‌رده‌مێ سه‌ربه‌ردایی ده‌.
هه‌گه‌ر پێژنا من هات، شێخێ سه‌نعانی ببینه‌ و بلا داستانا من و ته‌ بنڤیست، ده‌روێشێ سه‌مادار ڤه‌خوینه‌، بلا ب ده‌فا خوه‌ ریتما زندیبوونا من بژه‌نت...

ئه‌ز:
ئه‌ز ژ وه‌لاتێ شێخێ سه‌نعانم
ئه‌ز ژ وه‌لاتێ ده‌روێشێ سه‌میانم
ئه‌و شێخ شێخێ منه‌،
ئه‌و ده‌روێش ده‌روێشێ منه‌،
ئه‌و وه‌لات وه‌لاتێ منه‌.

وه‌لات: تژی ئاخه‌... تژی کرمن... تژی شه‌هیدن... تژی ئه‌زم.
ئاخ: ‌تژی وه‌لاته‌... تژی کرمن... تژی شه‌هیدن... تژی ئه‌زم.
شه‌هید:‌ تژی وه‌لاته‌... تژی کرمن... تژی ئاخه‌
ئه‌ز:‌ تژی وه‌لاتم... تژی کرمم‌، تژی ئاخم‌.
و هه‌می پێکڤه‌ تژی ژ ته‌.

 

بلا باوه‌ردارێن کو جاره‌کێ ب تنێ ژی گومان د خوه‌ ده‌ نه‌کرین، ئایه‌تێن خوه‌ بخوینن به‌لێ سرۆدا من‌ ژبیر بکن. بلا گومانێن من د هه‌بوون و نه‌بوونا خوه‌ ده‌ ل بێده‌را بێ گێره‌، به‌ربا بکن. بلا ل دۆر کێلا سه‌رێ من بره‌قسن هه‌تا حێج ببن. ئه‌ز ژ پرسیارێن مه‌له‌کۆتان ناترسم... به‌لێ نزانم چاوان به‌رسڤ بدم هه‌گه‌ر هات و پرسیار کرن، چما من ژ ته‌ حه‌ز کر؟! چما ته‌ ژ من حه‌ز کر؟!

 

پشتی دمرم...

وان داڤێن سپی ژ پۆرا خوه‌ بکه‌ سیمێ تور‌با من
دا بزانن مه‌ریدێ ته‌ریقه‌تا عشقا ته‌ مه‌ ئه‌ز

 
شه‌ڤیارێ شه‌ڤستانا سپی خه‌ونا ته‌ مه‌ ئه‌ز
موسافرێ مه‌سافاتێن مژا مه‌وسمێن ته‌ مه‌ ئه‌ز
به‌راڤێن بێری و به‌نده‌مانا برینێن ته‌ مه‌ ئه‌ز
ستێرکا، سه‌هه‌ندا،  سه‌ماواتێن سوبا ته‌‌ مه‌ ئه‌ز
مرۆڤه‌ک سپی ل سه‌ر کۆپیتکا عه‌ره‌فاتا ته‌ مه‌ ئه‌ز
قه‌ده‌ر... و قیبله‌نامه‌یا قه‌رارا نه‌فسا ته‌ مه‌ ئه‌ز
عاشق و مه‌عشوق و عیسایێ عه‌یدا ته‌ مه‌ ئه‌ز
گازییا، گومانا، گه‌ردوونا، گه‌رده‌نا ته‌ مه‌ ئه‌ز
به‌رسڤا بیهۆکێن به‌حرا بێهنا ته‌ مه‌ ئه‌ز
ژڤانێ، ژانا، ژه‌نینا، ژیانا ته‌ مه‌ ئه‌ز
که‌سه‌را، که‌ده‌را، که‌وسه‌را ئه‌سمه‌ردێمی ته‌ مه‌ ئه‌ز
باگه‌را بنار و بزاڤا به‌ژن و بالا ته‌ مه‌ ئه‌ز
سحرا، سه‌رابا، سحارا، سه‌ربه‌ردانا ته‌ مه‌ ئه‌ز
رێڤنگێ رێکا ره‌ڤینا راڤا ته‌ مه‌ ئه‌ز
شه‌هیدێ، شاهدێ، شه‌ها شه‌هوه‌تا ته‌ مه‌ ئه‌ز
دلدار و ده‌لیل و دلێ بێ دلییا ته‌ مه‌ ئه‌ز
کار وکێفه‌راتا که‌ربا کین و کیانێ ته‌ مه‌ ئه‌ز
بار و برین و به‌رێ بێهووده‌ییا به‌رائه‌تا ته‌ مه‌ ئه‌ز
گل و گازنده‌ و گازییا گۆمانا گیانێ ته‌ مه‌ ئه‌ز
کێل و کولیلکێن که‌لها کۆمارا ته‌ مه‌ ئه‌ز
ئێش و ئازار و ئاگرێ ئارژه‌نا ئارهانا ته‌ مه‌ ئه‌ز
دیل و ده‌رد و ده‌رمانێ ده‌مارا دلێ ته‌ مه‌ ئه‌ز
میهر و مه‌هده‌رڤان و مراد و مه‌ره‌قا ته‌ مه‌ ئه‌ز
نه‌ژاد و نژده‌ڤانێ نژینا نزا ته‌ مه‌ ئه‌ز
لاڤ و له‌یلان و لۆرینا له‌یلایێن ته‌ مه‌ ئه‌ز
ده‌نگێ بێده‌نگییا ده‌نگڤه‌دانا ده‌نگێ ته‌ مه‌ ئه‌ز
خه‌ون و خرمان و خه‌ما خه‌لوه‌تگه‌ها ته‌ مه‌ ئه‌ز
سرێ سه‌مایا سه‌رێ سیمایێن ته‌ مه‌ ئه‌ز
مه‌ی و مه‌هن و مه‌والا مه‌یلا مه‌مکێن ته‌ مه‌ ئه‌ز
عیتر و عه‌قیق و عیلاجێ عله‌تا ته‌ مه‌ ئه‌ز
ئیلاهـ و ئیلهام و ئیلاماشائا شیننامه‌یا ته‌ مه‌ ئه‌ز
قوربانێ

قودره‌تا

قه‌رارا

قه‌تلێ ته‌ مه‌ ئه‌ز.