سەبری سلێڤانەیی
09/03/2011 15:01دههـ خهون
"چهند ب سانهھی یه پهسنێ سهركهڤتنێ، بهلێ چهند ب زهحمهته ڤهناسینا شكهستنێ؟"
ھهرشهڤ، ب ئهفسانهیا بهنگینییهکه نوو، ئهز ھهستێن خوه یێن ئازری رازی دکم، بهژنا خوه یا کو د بن ئاخا نھێنیێن لاوینییێ ده، دارزیایی، وهک دانگا ل دۆر دستاری، دادقوتم. مینا پارسهكهكی، ھهناسهگهھا خوه ب ههسرهتا تهڤنێ بێرییا ته ددوریم، ژ سالێن تهمهنێ خوه درهڤم و بۆ دوماھیك جار بهر ب مێرگێن ته یێن خوناڤی پهنایێ رادگهھینم.
زهنگهلۆرا خوه ژ پریشكێن پهیڤێن قهدهغه رادمالم، ژ بۆ ھهڤپهیڤینا ته خوه فێری زمانهك نوو دكم. د سینگێ ساھییا ئاسمانێن غهریبیێ ده، رۆژا خوه یا هل ڤهدمرینم و ل بهر دهرازینكا قیبلهگهھا ئهڤینا ته ھوور ھوور دكم، ب جلکێن سپی خوه دپێچم، دچم تهوافا بهرێ بهیتێ ل سهر ئهرزنکا ته.
ب گولۆلهك رۆناھییێ، ژ گوننهھێن سالگارا دێرین خوه تافێل دكم. تایا مرنێ، سوولاڤێن خوێدانێ ب سهر قارقوودهیێ من ده دھهركینت، چاڤێن من وهک دوو بهلگێن پایزێ ژ دێمستانێ من ھهلدوهرن و ل قهراغێن ئێستگهههک ڤالا دچرمسن.
ل بیرا من دھێت، ل سهردهمێ ڤهقهتیانێ دهمارێن من ببوون كێلیێن دوریارا زهمینی و ل سهردهمێ چكبوونێ ژی خوینا من ببوو بهڕكا سۆر و ل ژێر پێنگاڤێن مهلكهمۆتێ مرنێ ھاته رائێخستن. ژ ھینگێ وهره ئهز دچهوسم، لهورا، د دوماھیك كورتهپستان ده، بیڤهلهرزا ڤهدهنگێ لاڤ و ڤهپهریانا من د نڤێژا ئهڤینێ ده عهرشێ ئیرۆسی ڤهدلهرزینت و باسارییا ھهموو ئهڤیندارێن بێمراد دگهھینت.
بێھووده یه خواداوهندی ل زهمانێ ئازادییێ.
پڕ زهحمهته، کو بهنییهك ئازاد خوهدایهك دیل بپهرێست...
ما تو دزانی، ئهز دكارم ل سهر ھهر كاغهزهك سپی خوهدایهكێ بئافرینم؟
ما تو دزانی، رۆژێ ئهز چهند كاغهزان دقورمچینم...؟
بهلێ، د ئاخا كیژان وهلاتێ ئازاد ده بسپێرم و كیژان ناسنامهیێ ل سهر كێلا سهرێ وی بنڤیسینم؟ و نه وهلات... و نه ناسنامه... و نه ژی زمان.
ئهڤینگهھا مه كاڤله... دهرگههـ داخستی یه. پهنجهره بوونه سڤانده بۆ تهیر و تهوالێن دهمساڵێ پێنجێ. ژ بلی هندهک بیرهاتنێن زارۆکییا دلسۆژ و تهڤنێ پیرتهڤنکان و زلکێن هێلینا حاجیرهشکێ، تۆ دکاری بێژی من کا چ مایه...؟
و نۆکه...، ل کۆسهرا ئهڤینگهها مه، زارۆكێن بێگوننهھ چینکانێ دلهیزن و ئهز ژی چاڤێن خوه دنقینم، ل هێڤییا دهنگێ پێن ته، بێھنا پۆرا ته، تریسكێن شهبهنگا ته و پریسكێن بارانا ته، ئهز دمینم.
ب هزر و رامانێن پێل و قهرمی ئهز سهرێ خوه دتهقینم.
ل سهر دهرزهدیوارێ شوونواران، ئهنیشكا خوه دپالینم، وهک حهزرهتێ سلێمان ھهموو ئازار و خهم و پهژارهیێن خوه دجڤینم، پاشی بهۆست بهۆست، گاڤ ب گاڤ، فهرش دکم، رێکا ته پێ دخهملینم، بهلکی ئاگرێ کو بهربوویه هناڤێن من بڤهمرت، و ھهستێ سهرکۆنهیا وژدانێ نهمینت. بهلێ مهرهق ههر دمینن:
مهرهقا دیتنا یێ ئهز ئافراندیم...
مهرهقا دیتنا وێ ژنکا کو هێژ ژ من حهز حهز دکت...
مهرهقا دیتنا دهھ خهونان...
1
ل سهرێ ملێ
رۆناھیێ ئهنیا من رامووسا،
لێ، تهپهرهپا ھهسپێن غهزۆیێ
خهو ژ چاڤێن من ڤهڕهڤاند
شاھسوار، ژ بلندییان دادكهڤتن سهر دهڤێن خوه
و ئاخێ ژی،
ب ھهلمرسینا لێڤێن مرنێ،
سۆر دكرن لێڤێن خوه.
2
ل بهربانگێ،
رۆژ كێلیكهكێ درهنگ ما
ستێر ڤهدمرین
و ئهز ژی...،
ل ملدهفێ دایكا خوه دگهریام.
3
گغگغا زارۆکێن ساڤا
ب سهر بانگێ مهلایێ دكهڤت
و ب چهلپێنیا ماسییان د كانیێن چاڤێن من ده
تیقهتیقا كهنیێ ته بوو.
4
د قهیرستانێ ده،
ئهز دبووم كهچهك و
من پۆرا سپی ڤهدھاند
چونكی راستیێ،
دوماهییا زهلامان رادگهھاند.
5
ل كهڤۆكێن شاپهڕسپی
ئاسمان ببوو سێلهك سۆر
رۆژ ببوو مستهك خوهلی
و د كێفهراتا مرنێ ده،
ته دخوازت،
ئهز لێڤێن خوه بھاڤێژم لێڤێن ته.
6
ئهزێ ئادهم ل سهر زهمینی ل بهندی ته
بهلێ، ته ل گهل ئیبلیسێ خوه دا ڕهڤانێ و
زهلامهک نهدیتی و نهبیناتی ھوون ل ھهڤدوو مهھر دكرن.
7
باران دباری... و
ل بهر سڤاندهیا خوهدێ، ئهز ڤهدلهرزیم
بهلێ، وی دهرگهھ داخست
و چرا ڤهمراند.
8
ھهموو زهلام...
ھهموو ژن...
چیپلاق تازی ھهلدپهرین
من خوه ب كراسێ خوهدێ ڤه گرت
بهلێ،
وی ژی خوه تازی كر
و ھهلپهری.
9
بهری کو ئهز دهستێ ته یێ راستێ بگرم
ته دهستێ من یێ چهپێ بهردا.
10
ل كولبهیێ
گولیگهنمهك تنێ دما
من دڤیا ئهز بچوینم
بهلێ
ته
خوار.