مریه‌ما سترانا عه‌مرێ مه یه: عه‌بدال نووری
18/03/2011 14:17
وه‌رن ئه‌م ب هه‌ڤرا د گه‌ل خوێندنا "مه‌ريه‌ما" يێ، سترانا عه‌مرى بسترين، ڤه‌گێرێن وێ ژى بلا كچێن قوربانڤان بن، ئه‌و كچه‌ژنێن په‌ردا كچينييا خوه ژ ده‌ستداين و نه‌بوينه دايك. به‌ره‌ڤاژی مه‌ريه‌ما دن، ئه‌وا په‌ردا كچينييا خوه پاراستى و بوويه دايكا كاريگه‌رترين كه‌س د ديروكێ دا.
وه‌رن، دا د گه‌ل "مه‌ريه‌ما" يێ دا، سايكولوژيا چوار ره‌وتێن سياسى – دناڤا مه‌زنترين نه‌ته‌وه ل سه‌ر رۆيێ عه‌ردى و نه بويى ده‌وله‌ت – ب خوينن، ئه‌و ره‌وتێن تێرا خوه شه‌ر ژ بو يه‌كبوونێ كرين و ل ئه‌نجامێ داويێ پێتر ژ هه‌ڤ هاتنه په‌رچه‌كرن و جودابوون.
وه‌رن، دا ئه‌م ژى د گه‌ل "مه‌ريه‌ما" يێ دا، ل نيڤا دن يا وێ ب گه‌رن،به‌لێ ل كۆ ده‌رێ؟ ل ناڤ ريهێن ئيسلاميه‌كێ پاشڤه‌رۆ، يان ل قادا سۆر، يان ل بورجا ئيڤل، يانژى ل ناڤ به‌رينيێن شكه‌فتا شانه‌ده‌ر، دێ هه‌ر بينين به‌س ئه‌و نه‌به يێ كو دهندر شه‌رێ نافخوه‌يى دا ئاميرێ مێرانييا خوه ژ ده‌ستداى!.
به‌لێ، دين + جنس + سياسه‌ت پێكهێنه‌رێ مزه‌يێ نڤيسكارێ ڤێ رومانێ "سه‌برى سليڤانه‌يى" نه، كورسيكه‌كا پێپك شكه‌ستى و مێزه‌كا هژهژوك بوتلا فيرى سه‌مايێ دكه و خه‌يالا مه ژى ل گه‌ل بانگێ سپێدێ د گه‌ل دويكێلا جگارا دا ل فه‌زايێ مه يێ بێهن ته‌نگ دا ڤه د گه‌رێته‌ڤه و، ل به‌ر گوتنێن مه يێن قه‌ده‌غه ژى پشيكێن برسى د خه‌و دچن. به‌لێ، ب ڤى ئاوايى شه‌ڤ و شه‌ڤبێري يێن "سليڤانه‌يێ" هاڤيبوويى - يێ چه‌ند سالێن خوه ل وه‌لاتێن بيانى برنه سه‌ر- ب ئه‌لندا روژه‌كا نوو د قه‌تن و ئه‌م ژى د گه‌لدا . . .
"مه‌ريه‌ما" يه‌كه‌م رومانه د پارچه‌يه‌كا دياركرى ژ جيوگرافيا روژهه‌لاتا ناڤين دا، ب بهايه‌كێ مادى تێ كرين و ريكلام ژێرا تێ كرن و رێژه‌يه‌ك ژێ تێ فروتن. هه‌ر وه‌ها يه‌كه‌م رومانه ژى ب رێيا وه‌رگێرانێ بو سه‌ر زمانێ ئنگليزى ب په‌ر دكه‌ڤه‌و، وه‌ك كاروانێ قازو قولنگا سنوران باز دده به‌ر ب چاڤ و مه‌ژيێ خوێنده‌ڤانه‌ك نوو و بيانى.
"مه‌ريه‌ما" يێ ب خوينه، به‌رى ئه‌و ته ب خوينه.
ب هيڤييا ئاشتيێ
عه‌بدال نورى
ل روژا ئاشتييا جيهانى/2009
