ژیان و پرسێن ھلاویستێ بوونە بنگەھ بۆ مژارێن من
13/08/2011 20:13سەبری سلێڤانه‌یی: "سینۆران نەدھشتن ئەز فێری ئازادیێ ببم"
هه‌ڤپه‌یڤین : ئه‌ڤین به‌رجه‌م بۆ مالپه‌رێ نه‌ته‌وه. کوم
ڤێ جارێ مێڤانێ مە نڤیسکارەک تەمەن جوان ژ کوردستانا باشوورە. سەبری سلێڤانه‌یی.
نڤیسکار سەبری سلێڤانه‌یی سالا ١٩٧٢ دە ل زاخۆ ھاتیە دنیایێ. سالا ١٩٩٢ دە ل دوھۆکێ بوو مامۆستا. بیستەک دەرییێن سییاسەتێ ڤەکر، لێ، حه‌زکرنا گۆتنێن ل سەر رووپەلان ئه‌و کشاند بەر ب جیھانا ئەدەبیاتێ.
سالا ١٩٩٣ دە ژ وەلاتێ خوە دوور کەت و چوو ھۆڵاندایێ. ھەتا سالا ٢٠٠٦ ل ھۆڵاندایێ ما. ئەدەبیاتا جیھانێ و کوردی بوون ھەڤالێ غەریبیێ ژ سەبری سلێڤانه‌یی رە. کیتێب ل سەر کیتێبان ھاتە خواندن. رێزێن کیتێبان بەرێ سلێڤانه‌یی دیسا ڤەگەراند کوردستانێ و سالا ٢٠٠٦ ئان دە ڤەگەریا دوھۆکێ.
ژیانا نڤیسکاری و خواندنێ ب مامۆستاتیێ رە دمەشینە. کەن و دەنگێ خوەندەڤانێن خوە رە ھارمۆنیا ژییانێ ئاڤا کریە. ژ بۆ نڤیسکارەکی مامۆستاتی ئیدیالە… ژ بۆ زارۆکان، مامۆستاکی نڤیسکار ئیدیالە.
رۆمانا سەبری سلێڤانه‌ییا یەکەمین د سالا ٢٠٠٤ دە ب ناڤێ "ئاڤامەزن – کێلیکا کو ماسیێن خوە تی دھێلە" دەرکەت.
کیتێبێن سلێڤانه‌یی یێن ھەتا نووھا ھاتنە چاپکرن ئەڤن:
- ئاڤامەزن-کێلیکا کو ماسیێن خوە تی دھێلن. رۆمان 2004
- بیست سال و ئێڤارەک. رۆمان 2005
- مریەما-کەچەژنەک ژ زمانەک دن. رۆمان 2007
- ھەلبەستا ١٠ خەون، ب بەشداریا ١٢ نڤیسکار و ھەلباستڤان ژ دەڤەرا بەھدینان. 2007
- پایزا پەیڤان – خواندنێن هزری و فه‌لسه‌فی. 2009
- ژ ده‌ستپێکێ هه‌یا ده‌ستپێکێ. هزر و ره‌خنه 2009
- سیفرا سلیڤی. رۆمان 2010
- رۆمانا مریه‌ما چاپا ئنگلیزی 2010
- رۆمانا مریه‌ما چاپا لاتینی 2011
ئەڤین بەرچەم: کییە سەبری سلێڤانه‌یی؟
سەبری سلێڤانه‌یی:
ئەڤ پرسیار نە ھێسانە. ل بال من ئەڤ پرسیارا ھەری زه‌حمەتە. نڤیسکار بەری ھەر تشتەک دن، مرۆڤە. مرۆڤ ژی د لێگەریانێ دەیە، بەردەوام ھەول ددە خوە ناس بکە، ئەڤجار نڤیسکاری ب خوە، دکارم ببێژم، کو لێگەریان و ھەولدانا خوەناسکرنێ، خوەگۆتنێ، خوەدیتن و خوەپێشکێشکرنێیە. ئەز نکارم وەک ھەبوون و ئاڤاھی خوە بدم ناسکرن ژ بەر کو ئەز ژی ئەینی پرسیارێ ژ خوە دکم، لێ دکارم ببێژم کو سەبری سلێڤانه‌یی ژ برینا ئاخ و ئاڤا نەتەوەک ژبیرکری تێ و پارزینکێ وی پرە ژ پرسیار و گومانێن قەدەرا مرۆڤبوونێ. تو باوەر دکی، ئەز ژی نزانم کا ب ئەسەھی کەنگی ھاتمە ڤێ ژیانێ؟ ئەز ھاتمە، ژ مێژ دە ئەز ھاتمە، لێ کەنگی و چما و ژ بۆ چی؟ ئەز نزانم و گومان دکم کو کەسەک دن ھەبە و بزانبە. ئەو نەزانین ژی، نابێژم باشە، لێ گەلەک خوەشە. گەلۆ ما فەرقەک ھەیە، کو کەنگی ئەز ھاتمە، ل کور دژیم، کیژان کاری دکم و… ھتد ژ ڤان پرسیارێن بێتووتە؟
ھندەک دبێژن سەبری سلێڤانه‌یی ل تیرمەھا ١٩٧٢ ئان ھاتیە ڤێ ژیانێ دا کو بژی و بەس. ھندەک ژی دبێژن ل چریا یەکێ ١٩٧١ ئان ھاتیە ڤێ ژیانێ بەلێ نزانن کا ژ بۆ چی ئەو ھاتیە. لەورا دبێژم، نە گرینگە کا کەنگی ئەز ھاتم ڤێ ژیانێ، ئان ڤێ مرنێ، چونکی نە گرینگە ژی کەنگی بچم. ب راستی ئەز نزانم. مارتن ھەدەگگەر دبێژە: مرۆڤ تێ ڤێ ژیانێ دا کو بمرە. سمۆنە دە بەاڤۆر، دبێژە مرۆڤ تێ ڤێ ژیانێ دا کو بژی. خویایە کو ھەردو راست دبێژن ژ بەر کو ئەز د ژیانەکا رۆژانە دە دمرم و د مرنەکا رۆژانە دە دژیم. ل سالا ١٩٩٣ ئان دیسان ئەز بوومە پەنابەر، بەلێ ڤێ جارێ ل وەلاتێن بیانی، بەریا وێ ل وەلاتێ خوە (باشوورێ برینێ). د ھەیاما خەربیێ دە من گەلەک خواند، ئەز موژوولێ فەلسەفە و ئەدەبیاتا جیھانێ بووبووم ھەیا کو ئەزموونا من ل گەل رۆمانێ دەست پێ کر. ل غەریبیێ نڤیسین بۆ من بووبوو وەلات، بەلێ ل وەلاتی نڤیسین بۆ من دبە خەریبی. ئەز، وەلات، دەم و یارێن خوە ژ ھەڤ ڤەقەتیابوون، بەلێ ئەدەبیاتێ ئەم گەھاندن ھەڤ.
ئەڤین بەرچەم: تە کەنگی دەست ب نڤیساندنا خوە کریە؟
سەبری سلێڤانه‌یی:
دەما من ھەست کر، کو گەرەکە ئەز دەربرینەرێ دەرد و تەراژیدیا ھەیی بم، بەرپرسیارێ ئەخلاقیێ سەردەمێ خوە بم، ئاڤاکەرێ پەیامەکا ئەپستمی و بەرھەمدار بم. د تەمەنەک زوو دە من ھەولدا وێ یەکێ بزانم، ئانگۆ ل سالا ١٩٨٧ ئان دە، نھا ژی تەمەنێ من ٣٧ سالە ھەگەر کو ناسنامە راست دبێژە. ل دەستپێکێ من دنڤیسی، نڤیسا من تەنێ خوەگۆتن بوو، ئەزموونەکا زاتی بوو، ژ مەملەکەتا خوەا بچووکا وی چاخی دەرباز دبووم ژیان و جیھانێ، بەلێ من نڤیسارێن خوە ل تو جھان بەلاڤە نەدکر، من بێھتر گرینگی ب خواندنێ ددا. ئەو بوو کو ل سالا ١٩٩٢ ئان من یەکەمین تێکستا خوە بەلاڤ کر و ھەیا نھا بەردەوام دخوینم و دنڤیسم.
ئەڤین بەرچەم:تەسیرا کیژان نڤیسکارێ کورد ل سەر نڤیسێن تە ھەیە؟
سەبری سلێڤانه‌یی:
من ژی وەک گەلەک دۆست و برادەرێن ئەزیز ب زمانێ سەردەستان خواندبوو. دبستان، پرتووکخانە و رۆژنامەگەری تەڤ ب زمانێ وان بوو. لەورا ژی نڤیس ب ئەینی زمانی بوو. ژ سالا ١٩٩٢ ئان و ھەیا نھا ژی ھێژ ب وان زمانان دخوینم، بەلێ یەدی ب وان زمانان نا نڤیسم. لەورا، ھەگەر کو باندۆرەک ھەبە ژی، وێ نە باندۆرا نڤیسکارێن کورد بە ژ بەر کو بەرھەمێ وان، زوو ب زوو، نەدگەھا دەستێن مە. من جزیری و خانی خواندبوون، لێ نە وەک زمان و فەلسەفە، بەلێ تەنێ وەک ھندەک تێکستێن کو ژ ئالیێ سەردەستان ڤە، ب رێنڤیس و گەرامەراکا بێسەرووبەر دھاتن ئامادەکرن. تەنێ دەم و تەراژیدیا کوردی ھندەک تەسیرێ ل من دکن و باندۆرا وان د کەدا من دە خویا دبە.
ل رۆژھەلاتێ، وەلاتێ رۆژێ، حه‌زکرن گونەھە، قەدەغەیە، ژ کەبایران تێ ھەژمارتن، وان ئەم فێری حه‌زکرنێ نەکربوون، تەنێ ئەم فێری کوژتن، کەرب و کین و نەڤیانێ کربوون لێ خوازتەکا مە ھەر حه‌زکرن، ڤیان و ئاشتی بوو.
ئەڤین بەرچەم:تو مژارا خوە ژ کو – چ تینی؟
سەبری سلێڤانه‌یی:
نڤیسکاری نە تەنێ نڤیسینا پرتووکانە. نڤیسکاری بێھتر ھونەرە، ستاتیکە، ئافراندنە وەکو خایەت، فانکسیۆنە وەک ماھیەت. لۆنجینۆس دبێژە: نڤیسکاری دکارە نڤیسکاران بلند بکە ھەیا رادێ خوەداوەندیێ، نڤیسکارێ مەزن ب سەرێ خوە خوەداوەندەکە. سارتەر ژی دبێژە: نڤیسکار نە نڤیسکارە چونکی دەربارێ ئشتان دنڤیسە، بەلێ نڤیسکارە چونکی ب رێک و ئاوایێن تایبەت دەربارێ تشتان دنڤیسە. مامۆستایەکێ ل کۆلیژا یاسایێ، ل دوھۆکێ ب ناڤێ ( قەیسەر) کو ژ ئەسلێ خوە ئەرەبە، گۆت: ئەمێن یاسازان ھەژانە کو جیھان تەڤ بەژنا خوە ژ بۆ مە بتەوینە، بەلێ تەنێ کەسێن نڤیسکار (وێژەڤان) ھێژانە کو ئەم بەژنا خوە د بەر وان دە بتەوینن. گۆتنا وی ھێژایە و جھێ راوەستانێیە، گەلۆ چ گەرەکە ھەیا کو مرۆڤ بگەھە وی ئاستێ بلندێ داھێنانێ؟
ب ھزرا من جدیەتا نڤیسکار و ئاوایێن سەرەدەریا وی ب پرس و پرسگرێکان رە، شێوەیێ دەربرین و ئانالیزا وی بۆ ھەر پرسەکا ھەبە، نڤیسکار نابە پرس و بوویەران وەرگەرینە، ئان تەنێ ڤەببێژە، لێ بەلێ ھەول بدە دەربرینێ بکە و بەشداری ئاڤاکرنا ھزرا کەسێن خواندەڤان ببە. مرۆڤ و ژیان و پرسێن ھلاویستێ بوونە بنگەھ بۆ مژارێن من. ھەر مرۆڤەک، ژیانەکە، مرنەکە، خەونەکە، پرسیارەکە، وەندابوون و دیتنەکە، ئاڤاکرن و خەرابکرنەکە، دەرد و تەراژیدیەکە، دەرگەھەکە ژ بۆ دەستپێکێن بێ داوی. ئەز گەلەک ل سەر پرسێن سادە رادوەستم ژ بەر کو ئەو پرسێن سادە زوو تێنە ژبیراکرن، لێ ئەینی پرسان دکارن تشتێن مەزن پێشکێشی مە بکن. ھندەک مرۆڤ، ھندەک دەم، ھندەک جھ، ھندەک پرس و ھندەک برین تێنە ژبیراکرن، ئەھا ئەز ھەول ددم ل ناڤا وان سینۆران بگەرم ب ھێڤیا کو فێھم بکم، ئەڤجار بنڤیسم و وێ نڤیسێ پێشکێشی خواندەڤانێ خوە بکم.
ئەڤین بەرچەم:تو پشتی چەند سالێن ل دەرڤەیی وەلات، شوندە ڤەگەریایە وەلاتێ خوە. چ بوو سەدەما ڤێ ڤەگەرێ؟
سەبری سلێڤانه‌یی:
ھندەک جاران ھندەک کەس ل جھێن خەلەت ژ دایک دبن و دژین، بەلێ ھندەک جاران ژی ھندەک کەس ل دەمێن خەلەت ژ دایک دبن و دژین. ئەز نە ژ خوەشیێن وەلات ڤەگەریامە وەلات. بەلێ ژ نەخوەشیێن دەرڤەیی وەلات ڤەگەریامە وەلات. من دگۆت قەی ئەز مرۆڤم و ھەر دەرا مرۆڤ لێ ھەبە، ئەو دکارە ببە وەلات بۆ من. وەک ھزر مافێ من ھەبوو وسان بھزرینم، بەلێ وەک دۆرھێل، جودا بوو. کەسێن وەکا مە، ئان د غەریبیێ دە دژین، ئان ژی د ژیانێ دە خەریبن. من ھەردو جێرباندن ھەڤالا ئەڤین. د ناڤبەرا ژیان و خوربەتێ دە حه‌زکرن و مرن ھەردو ھەیە، ئەز ژ خوە رە دبێژم: بلا حه‌زکرن رێک بە و مرن ژی دەرگەھ بە. جارنا مرۆڤ دکارە ھەڤسارێ قەدەرا خوە بگرە، بەرنەدە. قەدەرەکا بێتووتەیە، ھندەک جاران ھەنەکێن خوە ب چارەنڤیسا مە، برینا مە، خەون و پرسیارێن مە بەلەنگازان دکە. پشتی ھندەک ٢١ سالێن کو من ل وەلات قەداندنبوون، پشتی ١٣ سال و نیڤێن غەریبیێ ل وەلاتێن ئاورۆپا و پشتی ٣ سالێن دن ژی – دیسان ل وەلاتێ خوە – ژ نوو من فێھم کر کو ئەز خەریبم… خەریب. ئەم خەریب ھاتن، ئەمێ خەریب ژی خاترا خوە بخوازن، ئەم چ بکن ژی ئەمێ خەریب بمینن ژ بەر کو خەریبی و سینۆر د فرشکێ مە دە نە.
ل غەریبیێ، ئەز ب مرۆڤێن ئازاد رە ژیام. بەلێ سینۆران نەدھشتن ئەز فێری ئازادیێ ببم. لاشێ من ئازاد بوو، بەلێ روھێ من ل ھنداڤی سینۆرێن وەلاتەکێ پارچە کری دگەریا. ئەڤینا ھێژا، خویایە کو ئەز ئەخسیرێ روھێ خوە مە و روھێ من ژی ئێخسیرێ سینۆرانە. پشتی ڤان سالان، تو کەسێ پرسیارێ ژ من بکە، ئەزێ ببێژم: ئەز ژ وەلاتێ خوربەتێ و سینۆرانم.
ئەڤین بەرچەم:رەوشا نڤیسکاری و نڤیسکاران ل کوردستانا ئازاد چاوایە؟ چ نە کێماسیێن وە؟
سەبری سلێڤانه‌یی:
دبە کو رەوش ژ جھ بۆ جھی، ژ دەم بۆ دەمی، ژ کەس بۆ کەس دن جودا بە. بەلێ ھەموو ژی خوەگرتیێن ژیان و مرنەکێ نە، ھەموو ژی خوە ئامادە دکن، چ ژ بۆ خوەشیەک نێزیک ئان ژ بۆ ژانەک نێزیک. نڤیسکارێ کورد ژی وەک ھەر نڤیسکارەک دنە ل ڤێ جیھانێ، ب خوە و دەمێ خوە دھەسە، بەلێ مخابن وەکا ھەر نڤیسکارەک دن ل ڤێ جیھانێ ھزر ناکە، نا نڤیسە، دەربرینێ ناکە، پرسیارێن خوە پێشکێش ناکە، بەرپرسیاریا خوە ناگرە. نڤیسکارێ کورد، نە تەنێ ل باشوور، بەلێ سەرانسەر جیھانێ، ژ فانکسیۆنا خوە دوور بوویە لەورا ژی نکارە رۆلێ خوەێ بنگەھین پێک بینە. ئەو دووربوون نە مەسەلەکا قودرەتییە، نەخێر. بەلێ رەیاکسیۆنە بۆ رەفتار و ھەلوەستێن نڤیسکاران، رەیاکسیۆنە بۆ ئاستێ ئافراندنێ، رەیاکسیۆنە بۆ مێتۆدێن سەرەدەریێ ب پرس و پرسگرێکان رە، وێ دووربوونێ نڤیسکاری کریە پرسەکا ھەری سادە ل جھ و دەمەکێ نە سادە. نڤیسکارێ کورد ب گشتی بێ پێوەندی مایە، ئەو پێوەندی نە ل سەر ئەساسێ ھزری، فەلسەفی، ئەپستمی و رەوشەنبیری بوویە، بەلێ ل سەر ئەساسێ کەساتی و بەرژەوەندان بوویە لەورا گوھەرتن و کەساتی و بەرژەوەندان دە، کەفیلە کو پێوەندیێ ژی بگوھەرینە. نڤیسکاری، بەری ھەر تشتەک دن، ئەخلاق و پرەنسیپ و بەرپرسیارییە، بوھایێن خوەێن سەرەکی ھەنە، بەلێ مخابن د ناڤا کوردان دە، نڤیسکاری بوویە رەشکرنا کاخەزان.
ئەڤین بەرچەم:سلێڤانه‌یی کیژان نڤیسکارێن کورد (ھەمدەمی) دخوینە؟
سەبری سلێڤانه‌یی:
ئەز ھەر تشتی دخوینم، بەلێ ھەر تشتی نانڤیسم. ئەز ل تێکستا باش دگەرم، نە ل خوەدیێ وێ. کی بە، بلا ببە.
ئەڤین بەرچەم:"ئاڤامەزن – کێلیکا کو ماسیێن خوە تی دھێلە"، رۆمانەک ب تیپێن لاتینی ھاتیە نڤیسین. زوو ب زوو ئەڤین و ژیان ل رۆژھەلاتێ نایێ پاراستن، ھێڤی و ژیان ب چ دقەلبە؟ تو دکاری مژارا ڤێ رۆمانێ ھەپکی ڤەکە؟
سەبری سلێڤانه‌یی:
ئەو یەکەمین رۆمانا من بوو ل سالا ٢٠٠٤ ئان ھاتیە چاپکرن. ھەر کو ل بیرا من تێ، کەس بریارا ژیان و مرنا مە ددن، لێ دەم بوو ئەز بێژم کو گەرەکە ئەم بریارا خوە بدن، بریارا ژیان و مرنا خوە، بریارا حه‌زکرنا خوە. ئەو ژی قەدەرا بێتووتەیە، کو ئەم د تاریێ دە ھاتنە ڤێ ھبوونێ و ژی ھینگێ دە ئەم د تاریێ دە دژین. مرۆڤ ب حه‌زکرنێ دکارە دژمنێ خوە ژی بشکینە. حه‌زکرنا مەیە، ھەیا نھا ئەم زیندی ھشتنە، ئەم ژ ھەر تشتی ھەز دکن، تەنێ ژ ھەڤدوو ھەزناکن و پرسگرێک ژی ئەوە.
ل رۆژھەلاتێ، وەلاتێ رۆژێ، حه‌زکرن گونەھە، قەدەخەیە، ژ کەبایران تێ ھەژمارتن، وان ئەم فێری حه‌زکرنێ نەکربوون، تەنێ ئەم فێری کوژتن، کەرب و کین و نەڤیانێ کربوون لێ خوازتەکا مە ھەر حه‌زکرن، ڤیان و ئاشتی بوو. ئەدەبیات ھزرا مرۆڤان ئاڤا دکە ب تایبەتی رۆمان. ئەم دکارن ب رێکا ئەدەبیاتێ خوە پێشکێشی مرۆڤان بکن، بلا ئێدی دلێ تو کەسی ب مە نەشەوتە ژ بەر کو دیرۆکا مە کەڤنە، دەردێ مە مەزنە، تەراژیدیا مە ژی دوور و درێژە، خەونا مە زیندییە، بەلێ ھێژ ئەم بێتفاقن، مخابن. ئەدەبیات ب تایبەتی رۆمان، دکارە دەلیڤێن نوو ژ بۆ ئاڤاکرنا مرۆڤێن نوو، جڤاکێن نوو، پرسێن نوو، بدە. ھەگەر کو ئەم و ئەوێن ( سەردەست) ب ھەڤ رە وسان بزھرینن، وی چاخی ئەمێ بکاربن ھەڤدو قەبوول بکن و دەلیڤا ژیانەکا بەدەوتر قازانج بکن.
ئەڤین بەرچەم:ژیانا تە ل ھۆڵاندایێ ب خواندنا ئەدەبیاتا جیھانێ دەرباس بوویە، ب تایبەتی کیژان نڤیسکار و وێژەیا کیژان کاتەگۆری تەسیر ل تە کریە؟
سەبری سلێڤانه‌یی:
تو راست دبێژی. من تەمەنێ غەریبیێ ب خواندنێ دەرباس کریە، ب تایبەت خواندنا فەلسەفە و رۆمانێ. فەلسەفە کەڤنارە، ئانگۆ ڤەگەریان سەردەمێن بەری نھا: مێزۆپۆتامیا، دۆلا نیلێ، چین – کۆنفشیۆس- ، ھندستان. من ھەولدا ھندەکی ژێ فێھم بکم، بەلێ وان ژی بەرێ من دا ھندەک مەدرەسێن دن کو بێھتر بخوینم. ئەز مەجبوور بووم ھندەک مەدرەسێن دنێن فەلسەفی بخوینم بگرە ژ مەدرەسا ئایۆنی، فیتاگۆرسی و ئەیلی ھەیا مەدرەسا فرانکفۆرتێ، ژ تالیس، ھیراکلیتس و ئاناکساگۆراس ھەیا دۆستۆژەڤسکی و سارتەر. فەلسەفە (لۆژیک، ئەخلاق، رامیاری، میتافیزیک و ژیربێکی) ژیانا مرۆڤان دەسپلین دکە، لەورا ژی پێویستە مرۆڤ وان بخوینە ھەیا کو ھندەکێ ژ خوە و گەردوونێ فێھم بکە. ھندەک تەسیرا ھەگەل و فەلسەفا ئیدال ل سەر من ھەیە، ھەروھا ئاوایێ ئازراندن و پێشکێشکرنا پرسان دەما کو پارادۆکسان ب خوە ڤە دگرە. ھەر کەسێ کو فەلسەفە و ئەدەبیات خواندبن، بێ گومان وێ تەسیرا فەلسەفە و ئەدەبیاتا گریک، ئالمان و فرەنسا ل سەر خویا بکە.
ئەڤین بەرچەم:تو دکاری ھندەکێ بەھسا ھەلبەستێن خوە بکی؟ و د ڤر دە چار رێزەک ژ ھەلبەستا خوەا ھەری زێدە تو ژێ ھەز دکی بخوینی؟
سەبری سلێڤانه‌یی:
ئەو فێرسێ ب جلێن رەش د مژ و مۆرانا تە دە ( ئەزەک) بوو. ژ خەزۆ و فەتۆھاتان رەڤیابوو. روما خوە ھاڤێت، خەنجەرا کو تو جاری ژ کالانێ دەرنەخستی شکاند، نەوقا مەھینا شینبۆزا کو تو جاری مەخەل نەھاتی رامووساند، زین و مارکێن وێ بۆ پێژنا فێرسەک دیل پشتی ئازادبوونێ ھلگرتن، لخافا وێ سست کر، ئەڤجار بەر ب تاڤسۆرکێ ھاژووت…) ئەڤ پارچەک پەخشانێ بوو ژ ھەلبەستا ( ھندەک ژ تە و ھندەک ژ من کو ل سالا ٢٠٠٨ ئان ھاتیە نڤیسین.
و ھینا تو دبێژی: بێ من نەمرە!
لێ، ھەگەر دیسان ئەز مرم، تکا دکم مراریان ل سەر پەراڤێن خوە نەتەیسینە، سترانا دایێ مەنال ل بەر سەرێ من نەسترینە، نە نالینە. وەختا کو من دبن گۆرستانێ، مۆمێن میھرەداریێ ل ھنداڤی کێلا سەرێ من ھل نەکە، سوولاڤێن پۆرا خوە ب سەر جەسەدێ من دە نەھەرکینە. نە تۆفان دکارە من شل بکە، نە ژی دەنگێ سۆرھا مەلکەمۆتێ دکارە من ژ خەوا گران شیار بکە. تەنێ ل ئێڤارێن ئینێ، ل وان زارۆکێن بەر قەنتەرا گۆرستانێ بەلاڤە بکە و وێ دارزەیتوونا توربا من ئاڤ بدە. سلاڤان ل شێخێ سەنعان بکە و ژ دەروێشێ سەمادار رە ببێژە کو ئەز بێریا دەنگێ دەفا وی دکم…
ئەز ژ وەلاتێ شێخێ سەنعانم
ئەز ژ وەلاتێ دەروێشێ سەمیانم
ئەو شێخ، شێخێ منە
ئەو دەروێش، دەروێشێ منە
و ئەو وەلات،
وەلاتێ منە!
وەلات: تەژی ئاخە، تەژی کرمن، تەژی شەھیدن و تەژی ئەزم
ئاخ: تەژی وەلاتە، تەژی کرمن، تەژی شەھیدن و تەژی ئەزم
شەھید: تەژی وەلاتە، تەژی ئاخە، تەژی کرمن و تەژی ئەزم
ئەز: تەژی وەلاتم، تەژی ئاخم، تەژی شەھیدم
و ھەموو ب ھەڤرە،
تەژییە ژ تە! (ئەڤ ژی پارچەک دن بوو ژ ھەمان ھەلبەستێ. ھەلبەست گەلەکی درێژە، تو دکاری ببێژی کو رۆمانە ھەلبەستە).
"نە تۆفان دکارە من شل بکە، نە ژی دەنگێ سۆرھا مەلکەمۆتێ دکارە من ژ خەوا گران شیار بکە. تەنێ ل ئێڤارێن ئینێ، ل وان زارۆکێن بەر قەنتەرا گۆرستانێ بەلاڤە بکە و وێ دارزەیتوونا توربا من ئاڤ بدە. سلاڤان ل شێخێ سەنعان بکە و ژ دەروێشێ سەمادار رە ببێژە کو ئەز بێریا دەنگێ دەفا وی دکم…"
ئەڤین بەرچەم:رۆژەک سەبری سلێڤانه‌یی ل دوھۆکێ، کوردستانا ئازاد، چاوا دەرباس دبە؟
سەبری سلێڤانه‌یی:
سووبێ زوو ژ خەوێ ئان مرنێ شیار دبم. قەھوەا سوبەھان پر خوەشە، بێ قەھوە رۆژا من دەست پێ ناکە. ژ بۆ دەواما مامۆستایەتیێ خوە بەرھەڤ دکم. قەستا دبستانێ و ھەڤالێن خوەێن زارۆک دکم. سێ – چار سێتێن خوەش ب وان رە دەرباس دکم، ڤەدگەرم مالا خوە و جار فەراڤینێ دخوم، جار ژی ژ بیرا دکم. دەست ب خواندنێ دکم، رۆمانان و پرتووکێن فەلسەفێ پر دخوینم ھەیا دانێ ئێڤارێ. ھەگەر دەلیڤە پەیدا بوو، یەک ئان دو سێتان رادزم، ژ خوە ھەگەر پەیدا نەبوو وی چاخی قەستا دوھۆکێ دکم ژ بۆ کارێن دن. ئەز ب خوە ل سێمێلێ ئاکنجی مە، ژ دوھۆکێ نێزیکە. کار خلاس دبە، ئەڤجار ب ھەڤالێن خوە رە مژوول دبم و پرس و پرسگرێکێن دەمێ خوە دیسکاسیۆن دکن. ھەگەر دەلیڤە پەیدا ببە، سەرەدانا دۆستان دکم و تەڤلی سەمینار و ھندەک کاران دبم ژ بۆ کو پێوەندیا من ب ھەزکەر و خواندەڤانێن من رە قوت نەبە. ئەم بەردەوام دگەھن ھەڤ و دەربارێ فەلسەفێ و ئەدەبیاتێ دانووستاندن دکن.
ئەڤین بەرچەم: ئەز ب ناڤێ نەتەوە گەلەک سپاس دکم ژ بۆ ڤێ ھەڤپەیڤینێ و ژ تە سەرفرازی دخوازم.
سەبری سلێڤانه‌یی:
ئەز ژی سپاس دکم.ژ کارمەندێن و خوەندەڤانێن نەتەوە رەژی سلاڤان دشینم.
