سەبری سلێڤانەیی
09/03/2011 15:06د ئێستگهها دوماهییێ ده
ببارینه پچا مایی ژ رۆندکێن پهشێمانیێ
بهلێڤره قورزییێن کهڤنه خهونا ب تاریێ نخاڤتی
ل بهر بایێ پایزا غهریبییێ،
بههلوهرینه چقێن خوه... تاکێن خوه
بخهملینه قهراغێن کۆلانان ب بهلگێن زهر و
رابگههینه دهمسالێ وهرینێ
پاشی...
کا
دهستێ
ته!
سیمهرا د تاڤسۆرکێ ده ژبیرکری
فرین بێهووده یه ل ئهسمانێ بێ باران
خوازیارا حهزێن نماندی
نالین پڕبێژی یه ل ئێڤارییا بێ ستێر
عشقا د تنێیاتیێ ده هندابوویی
ئهڤین خوهکوژتنه ل تاڤهههیڤا بێ سهمیان
کا
دهستێ
ته!
بۆچی دترسی ژ مرنێ؟
ما قهی تۆ چو جار نهمری ی؟
ژ بیرا ته چوو، ل مرنا دوماهییێ،
من ب ئاڤا کانییا سپی تۆ ڤهشویشتی،
من ب دهستێ خوه تۆ خهملاندی و
د زهمینێ حهفتێ ده نژاندی
بهلێ...
کی ل سهر ته گریا؟
کا
دهستێ
ته!
ژبۆ چی حهز دکی پتر بژی؟
سالههان ساله و تۆ دژی
و هێژتا تۆ ب خوه خهونکی د راستییێ ده
راستی درهوهکه ل دهرڤهی سینۆرێن خوه
تۆیی سیبهرا رهڤییهکێ بێگوننههـ
تۆیی ههسرهتا دلهک دامایی ژ کهسهرێن مالئاڤاهییێ
ل گهل من رابگههینه زایینا ئازادیێ
کا
دهستێ
ته!
سالههان ساله و
تۆ ب ههردوو باسکێن خوه یێن شکهستی
تازیتییا خوه دنخێڤی
و ئهز ته دبینم
سالههان ساله و
تۆ بێ دهستنڤێژ و مهستی ل نڤێژگهها ئهڤینێ
و ئهز ته دپهرێسم
سالههان ساله و
تۆ گلیزێ لێڤێن خوه ههلدمریسی
و ئهز ب رۆژی
سالههان ساله و
تۆ سهرێ تلیێن خوه ، ب ئاگرێ هناڤێن خوه دسۆژینی
و ئهز ڤهدمرم!
دێ...
د دوماهیک ههناسهیان ده
ل گهل من رابگههینه وهرزێ خوهداوهندییێ
کا
دهستێ
ته!
نهێنییێن ئهڤینا ته یا زندی خهجخهجۆکن و د ئاڤێن شێلی ده دبشکڤن. راستییێن سالههان سالان چریسکن د زهلالییا رۆندکێ ده گاڤا کو تۆ ل سهر هنارکێن روویان دبارینی. تریسکێن ئاگرێ پیرۆز ژ ههموو برژانکێن ته دچن : ژ سهرێ تلێن ته... ژ سهرێ لێڤێن ته... ژ سهرێ مهمکێن ته... و ژ ئاورا ته یا ههژی زیمار. بێهووده یه، تۆ تهمهنێ مهحروومیێ درێژ دکی. بێهووده یه، ڤهدهنگێ ته ل چۆلستانا بهرین . دێ ڤێجا ب ههموو رهنگان : ب رهنگێن سار و گهرم... خوه بخهملینه و بێهنا بهدهنا خوه ل بهر فڕهکا بایێ من بفرینه... پاشی دیسان بمره و ههمدیسان.
ڤێ جارێ، ئهز دێ ههڤڕکییا خوهدێ بکم و ته د ئاخا سینگێ خوه ده بڤهشێرم، پاشی ئهز دێ خوه هوندا بکم... ئاوارهیهک بێسهروشوین د ناڤبهرا هێلێن پان و درێژ ده... و ژبۆ کو تۆسالێن مایی ژی ب تهکی تنێ نهقهدینی، ئهز دێ د بێریکرنا ته ده خوه بکوژم و وی چاخی بگههم ته و بایێ سهرمهدیێ بهینم بهختێ ههموو کونیلێن ته یێن داخستی.
هینگێ ڤێجا،
ل گهل من رابگههینه پێدڤییا مرنێ
کا
دهستێ
ته!