le monde diplomatique

یەمایێ نە ژ سەرھلدێرییا چەکداریا ل ھەمبەر دژمن دهێت، بەلێ ژ سەرھلدێرییەکە مێیانەیا ل ھەمبەر جڤاکا کورد، دەولەتا کورد ب خوەیە... "مە ژ بۆ پر تشتان شەھید دان، ئەز ژی ئامادە مە ببم شەھید، شەھیدا راستییێ" د جڤاکا یوونانی دە ژ راستگۆیان رە دبێژن پاڕھەسا. ژ بەر پاڕھەسیا دبت کو مرۆڤ جێلی ببت، تێکەڤت گرتیگەھان ئان ژی دبت کو سەرێ مرۆڤ بفرت، لێ یێن کو ب ئێشا پاڕھەسیایێ کەتبن، زوو ب زوو دەڤ ژێ بەرنادن. ئەو "سێڤا ب دارا رووت ڤە"یە؛ ژنخاسێن کو ژێ خواربن تم کورمێن وێ دهێتە وان. مریەما د جڤاکا مێر و کورد دە راستی گەلەک نەحەقییان دهێت. د زارۆکییا خوە دە دایک دمرت و ل بەر دەستێ دێمارییێ (ژنبابێ) دمینت. پشتی مرنا بابێ خوە، ب ناڤ لەپێن مەحەمەدێ مەیرێ دکەڤت دا کو زارێ مەزن (جن) ژ ناڤ وێ دەرخینت. لێ ل شوونا کو زارێ مەزن ژ ناڤا وێ دەرخینت، ب زێدەگاڤی سەمیانەکی د مالزارۆکا وێ دە چێدکت، کو ئەوێ ھەتا ھەتایێ مری بمینت. وێ ئەو د ناڤ رۆمانێ دە ھەتا ھەتایێ ساخ بمینت. ناڤێ تابلۆیەکە مریەمایێ "سەمیان"ە.
"ئەز بوونەوەرەکە مێ مە، بارێ من گرانە، چونکی ھەموو ب جارەکێ بەر ب نێربوونێ ڤە دچن…" مریەما دەرزێن روحا خوە ب تابلۆیان ددت دەر. ئەو ب خوە وێنەسازەکە. ئیستەگەھا ژیانا وێ یا دوویەمین ھەژارێ پێشمەرگەیە. مریەما ب تابلۆیا خوە یا ب ناڤێ "شوونوار" تەڤلی پێشانگاھەکە ھونەری دبت و ل وێ دەرێ راستی ھەژارێ پێشمەرگە دهێت. د ئەنجاما تێکلییێ دە ئەڤ دیالۆگا ھەژارێ پێشمەرگە یا واتەدار دەردکەڤت: "پارە ژبۆ خەرجکرنێ یە، نەیار ژبۆ کوشتنێ یە و ژن ژی تەنێ ژ بۆ سێکسی یە". د ئیستەگەھا ئەڤینێ یا دوویەمین دە ئیسلامێ کۆمونیست دەردکەڤت پێشبەری مریەمایێ. ئیسلامێ کۆمونیست د پێشانگەھێ دە پێرگی مریەمایێ دهێت و قۆناغەکە ئەڤینێ یا نوو دەست پێ دکت. ئیسلامێ کۆمونیستێ کو خوە ل سەر راستییێ کریە، راستییا وی د ئاخاڤتنەکە تەلەفۆنێ یا ب مریەمایێ رە وەھا دەر دبت: "تو حەز دکی ئەز ژ پێشییێ ڤە بێم تە، دا ژ کەچینییێ بکەڤی و ل داوییێ ب سەر من دە بمینی."
تیرمەھا سێیەمین - کو بوویەرێن ب سەرێ مریەمایێ دە دهێن، گشت د مەھا تیرمەھێ دە دەست پێ دکن- ھاوارێ ئیسلامی تەڤلی تەڤنا رۆمانێ و قەدەرا مریەمایێ دبت. د تالییێ دە ھاوارێ ئیسلامییێ کو دخوازت مریەمایێ ڤەگەرینت سەر دینێ ئیسلامێ، دەڤ ژ دینێ خوە بەرددت و ل شوونا کو ناڤێ خوەدێ و پێغەمبەران زکر بکت، ل نەخوەشخانێ ناڤێ مریەمایێ ب لێڤ دکت.
پاڕھەسا ناھێلت مرۆڤ ل چو دەرێ بسترت. ئەو دەر کوردستان ب خوە بت ژی. تالییا تالی، مریەما بریارێ ددت کو دەرکەڤت ئەورۆپایێ. لێ ژبۆ کو وێنەیێن پاساپۆرتێ بکشینت، دچت ستودیۆیێ و ل وێدەرێ راستی سەرپێھاتییا خوە یا داوین دهێت. بەلێ، راستی کرمانجی دهێت. کرمانج ژ وەلاتێ سوێدێ ڤەگەریایە و ھاتیە ل وەلاتێ خوە ب جیهـ بوویە. پشتی ئەڤیندارییێ موکرھاتنا کرمانج داوییێ ل رۆمانێ دهینت: "گۆت، ئەز نکارم تە مەھر بکم، ژ بەر کو ئەز ب کێری تە ناهێم. ئەز بریندارم، د شەرێ براکوژییێ دە فیشەکەک ل ناڤ لنگێن من کەت و دەمارا مێرانییێ قەتاند!"
ھەر کو ئەم چیرۆکەکێ ژ رۆمانێ دخوینن، ئەم دبینن کو پێشمەرگەیێن مە مافیاتیک، کۆمونیستێن مە فەۆدال، دیندارێن مە تەرکیسەلا و وێنەکێشێ مە ژی ژ مێرانییێ کەتیە. مریەما ب ھەبوونا خوە، رکا سەر تاکەکەسییا خوە و تابلۆیا خوە، روومەتێن جڤاکا خوارۆڤیچکی ب چاڤێن خوەیێن تابلۆیی رادخینە بەر چاڤێن مە.
ژ دەنگێ مەریەمخانێ ھەیا رەنگێن تابلۆیێن مریەمایێ، دەرزێن جڤاکێ دبن قەلیشتەک دا کو ل زەلزەلەیێن خوە راست بهێن.