ئینسیاتیڤا کۆمهلا ههلبهستڤانێن گهنج ل دهۆکێ
18/03/2011 14:09ئینسیاتیڤا کۆمهلا ههلبهستڤانێن گهنج ل دهۆکێ
رۆماننڤیس بلزاک دبێژت:" پهیڤ روح، دهنگ و رامانه" بهلێ ههتا کیژان رادێ پهیڤ ڤی بوهایێ مهزن دپارێزت؟ ههتا کیژان رادێ نڤیسکار یان ههلبهستڤان وی بوهایی دپارێزن؟ دهمێ کو قهیران پهیدا دبن، زیان دگههت ئاستێ ههر بزاڤ و لڤینهکێ، ههروهها دگههت رهوشا پێکهاتان ژی. پهیڤ ژی وهک بزاڤ یان پێکهاته تێرا خوه زیان دیت، ژ بلندبوونێ بهرهڤ نزمبوونێ دادکهڤت، ژ رۆناهییێ بهر ب زولوماتان دچوو، ئهو بوو کو هندهک بزاڤ و ئینسیاتیڤ پهیدابوون و بریار دان بهشدارییێ د چارهنڤیسێ پهیڤێ دا بکن، بوها و کهرامهتا وێ بپارێزن. ل ڤی دهم و جهێ ب ژبیرکرنێ حهمهر، ب داگیرکرنێ فرشککری، ئینسیاتیڤا کۆمهلا ههلبهستڤانێن گهنج ل دهۆکێ سهرهلدا. ئینسیاتیڤا ههلبهستڤانێن گهنج ههولدانهکا جدی و پێدڤییه د بوارێ ههلبهستا کوردیدا. ههلویستێ خوه برانبهر پرسا ههلبهستێ دیارکر و بریارا پارازتنا بوها و کهرامهتا وێ ژی دا. دبت کو پرانییا ئهندامێن کۆمهلێ ب تهمهن و ئهزموونا خوه گهنج بن، بهلێ ئهز باوهر دکم کو ب زمانێ خوه، ب خهون و خهیالا خوه، ب ساو و ساوێرا خوه ل سهر ههلبهستێ، ب غیرهت و حهزکرنا خوه بۆ ههلبهستێ، مهزنن... هند مهزن کو دهریا و چیا و رۆژ دبن پهیڤ... ب تنێ پهیڤ د میحرابا واندا. پڕانییا وان کهسان ژبیرکری بوون، د دهرزێن بیردانکا ڤێ خاکێ ده نخاڤتیبوون، د خرهجرا زمان و زاراڤاندا بێدهنگ بوون. بهلێ ب جهسارهتا فێرسان، ب شهرمینییا زاڤان، ب هاراتییا زارۆکان و ب حیکمهتا ریهسپییان، پهردا بێدهنگییێ لادان و ب لاڤژ و دهنگێن پهیڤان خوه پێشکێشی مه و سهردهمی کرن. زمان ههلبهسته، ههلبهست ژی زمانه و نۆکه ژ ههردهمهکێ دی پتر پێدڤییا مه ب زمان و ههلبهستێ ههیه. ئاڤاکرنا هندهک پرێن پهیوهندییێ دناڤبهرا نفشێ کلاسیک و یێ نووخوازدا کهفیله کو میراتێ ههلبهستێ بهێته پارازتن. ئهز پێشنیار دکم کو ههلبهستڤانێن کلاسیک ژی ئینسیاتیڤێ بکن، دهستێ ههلبهستڤانێن گهنج بگرن و ئهزموونا خوه، میراتێ خوه و بارێ خوه بسپێرن دهست وان دا کو ئهو ژی بهردهوامییێ ب دیرۆکا بزاڤا کلاسیکان بدن و سهرمهدی و زندیبوونێ بسهلمینن. ههلبهست ههلبهستڤانان دنیاست، نه بچووکی و نه ژی مهزنی دنیاست. لهورا ژی د ههلبهستێدا، مهزن و بچووک نینه، ب تنێ ئافرینهر و زندیبوون ههیه.
ل دوماهیکێ، پیرۆزباهییێ ل تهڤایا ئهندامێن کۆمهلا ههلبهستڤانێن گهنج دکم ب تایبهت ههلبهستڤانێ هێژا ههلگورد قههار، کو وهک سهربازهکێ بهرزه، کارێ خوه دکر. ههروهسان ههڤکارێن وی د جڤاتێدا. پیرۆزباهییا تهڤایا ههلبهستڤان و ئهندامان ژی دکم، ب تایبهت ههلبهستڤانێ کو بهشداری قووناغا دوماهیکێ بووین و ب ههلبهستێن خوه هێڤییهک دی، چریسکهک دی، رۆناهییهکا دی داینه شهڤستانا پهیڤا کوردی د باشوورێ برینا مهزندا.
رۆماننڤیس
سهبری سلێڤانهیی