ده‌ربارێ هه‌لبژارتنێن ئێکه‌تییا نڤیسه‌رێن کورد تایێ دهۆکێ
22/03/2011 02:53به‌رسڤا پرسیارا رۆژنامه‌یا وار ده‌ربارێ گرنگییا هلبژارتنێن ئێکه‌تییا نڤیسه‌رێن کورد و کونفرانسێ شه‌شێ
ده‌ربارێ هه‌لبژارتنێن ئێکه‌تییا نڤیسه‌رێن کورد تایێ دهۆکێ
سه‌بری سلێڤانه‌یی
پرس ب خوه پرسه‌کا هه‌زری و ئه‌پستمی یه و هه‌تا نها پرسێن وه‌ها به‌شداری ئاڤاکرنا گۆتارا کوردی (ره‌وشه‌نبیری، سیاسی یان جڤاکی) نه‌بوونه. د ناڤه‌ندێن ره‌وشه‌نبیری یێن بیانی ده ل جڤاک و وه‌لاتێن ئازاد، بسپۆری و گه‌ته‌گۆریزه هه‌یه، له‌ورا هه‌ر پرسه‌کا هه‌بت ره‌هه‌ندێن خوه هه‌نه و هه‌تا کو بکارت باندۆرێ په‌یدا بکت، گه‌ره‌که به‌ری هینگێ ئاوایێ سه‌ره‌ده‌رییێ و ئالاڤێ چاره‌سه‌رییێ، ئانکۆ ستراتیژی، بۆ هه‌بت. به‌لێ ل ناڤه‌ندێن ره‌وشه‌نبیری، ل جڤاکێن داخستی، پرس ته‌ڤ ل هه‌ڤ دبن، ره‌هه‌ندێن وان ناهێنه دیتن، بسپۆری و که‌ته‌گۆریزه نامینن، له‌ورا ژی باندۆر په‌یدا نابت یان کێمه.
هه‌تا کیژان رادێ ره‌وشه‌نبیرییا کوردی شیایه خوه پێشکێش بکت و فانکسیۆنا خوه یا دیرۆکی و ئه‌خلاقی د سه‌رده‌مێن جودا ده، ل گه‌ل ئافراندنا گۆتاره‌کا سه‌ربخوه، بسه‌لمینت؟ هه‌تا کیژان رادێ ل هه‌مبه‌ر ئاسته‌نگ و پرسگرێکان خوه به‌رپرسیار دبینت؟ به‌رهه‌مدانا ئه‌پستمی / مه‌عریفی ل ده‌ڤه‌رێ یا کێمه، لێ ما ئه‌و پرس ب خوه بوویه خه‌مه‌ک بۆ ره‌وشه‌نبیرییا کوردی؟ جڤاکێ داخستی باوه‌ری ب دوویالیزمێ، کو ژ دین و میتۆلۆژیێ هاتییه، هه‌یه: ئاهریمه‌ن یان ئاهۆرامه‌زدا، نزم یان بلند، بچووک یان مه‌زن، دۆست یان نه‌یار، قه‌نج یان خراب، دوور یان نێزیک و...هتد، له‌ورا ده‌لیڤا هزرکرن و داهێنانێ کێمه و تاکه‌که‌س نه‌چار دبت کو تاگر بت. به‌لێ تاکه‌که‌سێ ئازاد، کو به‌رێ بنیاتێ یه بۆ دامه‌زرینگه‌هه‌کا ئازاد، گه‌ره‌که ب خواندنه‌کا تایبه‌ت ل ره‌هه‌ندان بگه‌رت، دناڤبه‌را هه‌ردوو جه‌مسه‌ران ده، کار و خه‌باتا خوه بکت دا کو بکارت به‌شداری به‌رهه‌مدانا ئه‌پستمی ببت.
سیاسه‌تمه‌دارێ کورد نه مووسا پێغه‌مبه‌ره کو ب دارێ خوه گوهۆرینێ په‌یدا بکت و مافێ وی نینه وێ ئیدیعائێ بکت، به‌لێ مافێ وی هه‌یه رۆلێ هاریکاری ببینت هه‌گه‌ر ڤیا، یان ب ئالاڤ و کارێنێن خوه به‌شداری که‌د و به‌رهه‌مدانێ ببت. چما د هه‌ر بواره‌کێ ده په‌نایێ بۆ سیاسه‌تمه‌داری ببن؟ ئه‌و نه ژێده‌رێ پرسگرێکانه هه‌تا کو ببت ژێده‌رێ چاره‌سه‌رییان.
ب هزرا من باش نینه کو سیاسه‌تمه‌دارێ کورد ب ئیدۆلۆژی، ئانکۆ هزره‌کا سیاسی، سه‌ره‌ده‌رییێ دگه‌ل ره‌وشه‌نبیرییا کوردی بکت. هه‌روه‌سا، باش نینه وه‌ک هێزه‌ک به‌رانبه‌ر، یان هه‌ڤرک، یان ژی نه‌یار ل گه‌ل بدت و بستینت. یا باش ئه‌وه وه‌ک پالده‌ر و ته‌مامکه‌ر خوه پێشکێش بکت ده‌مێ ژێ بهێته خوازتن. لێ مخابن، په‌یوه‌ندی دناڤبه‌را وان ده نینه و هه‌ر گاڤه‌کا په‌یوه‌ندی چێبوو ژی، هینگێ دێ بیته هه‌ڤرکی هه‌تا دگه‌هت وێ رادێ کو ئێک هه‌بوونا خوه ل سه‌ر نه‌هێلانا یێ دی بسه‌لمینت و ئه‌ڤه گه‌له‌کا خرابه.
ئێکه‌تییا نڤیسکارێن کورد ل کوردستانێ هه‌تا نها نه‌شیایه رۆلێ خوه یێ بنگه‌هین بله‌یزیت، نه‌شیایه ب به‌رپرسیارییا خوه یا دیرۆکی و ئه‌خلاقی رابیت، نه‌شیایه ببت خوه‌دان ناسنامه و گۆتاره‌کا سه‌ربخوه، له‌ورا ژی نه‌شیایه به‌شداری به‌رهه‌مدانا ئه‌پستمی ببت. کانێ که‌د و به‌رهه‌مێ وێ ژ سه‌رهلدانا بوهارێ و هه‌تا نها؟ به‌لێ ئێکه‌تییا نڤیسکارێن کورد تایێ دهۆکێ هه‌تا راده‌کێ ئاوارته یه. من گه‌له‌ک تێبینی ل سه‌ر ماهییه‌ت و فانکسیۆنا وێ ژی هه‌نه، به‌لێ چاوان بیت شیایه ب ئالاڤ و شیانێن خوه هه‌تا راده‌کێ ناڤ، دیرۆک و ئاجندا خوه بپارێزت. لقێ دهۆکێ ل گۆر سیسته‌مه‌کێ فه‌دراسیۆنی کارێ خوه به‌رده‌وام دکت. به‌لێ دیاره ل ڤێ دوماهیکێ هه‌ولدانێن حزبی / سیاسی هه‌نه کو ئه‌و ناڤ و دیرۆک نه‌مینن یان دناڤا مه‌رکه‌زیه‌تێ ده بهێنه بوهژین. ل جهێ کو لقێن دی ژی وه‌ک لقێ دهۆکێ ئه‌کتیڤ ببن، مخابن، هنده‌ک دخوازن لقێ دهۆکێ نه‌ئه‌کتیڤ بکن. ئه‌ڤه وه‌ک مه‌سه‌لا نه‌هێلانا قوتابخانێن نموونه‌یی یه!
ئه‌ز دێ ب پرسیاره‌کێ ب دوماهیک هینم: تۆ بێژی ئێکه‌تییا نڤیسکارێن کورد / گشتی، بکارت دووری ئاجندێن حزبی / سیاسی پرس و پرسگرێکێن خوه چاره‌سه‌ر بکت؟ هه‌گه‌ر به‌رپرسیارییا ئه‌خلاقی و دیرۆکی هه‌بت، مه‌فرۆزه بکارت.
