"ده‌مێ کو پۆسیده‌یی وه‌کو سیبه‌را ئه‌وران ل هنداڤی ته دبۆرت و ته تێک دبت، هینگێ بزانه کو ژیان ته هه‌مبێز دکت، ته ژ بیر ناکت..." ریلکه
ریلکه : ده‌مێ کو پۆسیده‌یی وه‌کو سیبه‌را ئه‌وران ب سه‌ر ته ده دبۆرت و تو تێک دچی، هینگێ هزرا مرنێ نه‌که...!
سه‌بری : چما؟
ریلکه : چونکی هینگێ، ژیان ته هه‌مبێز دکت!
سه‌بری : وه‌ی ل ته! ژیان من هه‌مبێز دکت؟!
ریلکه : ئه‌رێ... و ته ژ بیر ناکت.
سه‌بری : کێ گۆته ته ئه‌ز ناخوازم بهێمه ژبیرکرن؟ هه‌ر کێلیکه‌ک ژ عه‌مرێ من دبۆرت، ده‌لیڤه‌یه‌ک پڕی ژیان دمرت... هه‌ر کێله‌که‌ک مرنه‌کێ رادگه‌هینت...
ریلکه : یان ژیانه‌کێ رادگه‌هینت!
سه‌بری : دبت. به‌لێ د هه‌ر کێله‌که‌کێ ده ئه‌ز غه‌دره‌کێ ل خوه دکم... ئه‌ز غه‌دارم غه‌دار. هه‌ر کێلیکه‌کێ ئه‌ز گونه‌هه‌کێ د ده‌رحه‌قا خوه ده دکم. مرۆڤ ژ هه‌ر که‌س دی پتر د ده‌رحه‌قا خوه ده گونه‌هکاره دۆستۆ! بێژه چما!
ریلکه : چما؟
سه‌بری : چونکی ئه‌ز نه ئازادم.
ریلکه : ما کی ژ مه ئازاده؟
سه‌بری : به‌لێ ئه‌م دکارن ئازاد بن!
ریلکه : ماده‌م مرن هه‌یه، که‌س ژ مه نه ئازاده هه‌ڤال.
سه‌بری : گدی ژیان... گدی ئازادی!
ریلکه : هنده‌ک جاران ژیان و ئازادی نێزیکی مرۆڤی دبن بێ کو مرۆڤ بزانت.
سه‌بری : من هزر دکر کو ژیانێ ئه‌ز ژبیرکریمه، به‌لێ هه‌یامه‌که و مویێن له‌شێ من وه‌ک زه‌ڤیێن گه‌نمی ل به‌ر باگێرا سه‌رێ ملان مه‌یلێ دکن، هینگێ هه‌ست ب لڤینه‌کێ دکم . هه‌یامه‌که... و ئه‌ز د تارییا ڤان شه‌ڤێن کامباخ ده، دکارم سیمایێن وێ ببینم و نامه‌یێن وێ بخوینم... هه‌یامه‌که و ئه‌ز ل بن سیبه‌را ئه‌وران خه‌ونا جاران دبینم.
ریلکه : دبێژن هوین بێقام ژ هه‌ڤدوو حه‌ز دکن. تۆ بێژی ژ بلی حه‌زکرنێ چ مابت ئه‌ز و هوین ل سه‌ر بنڤیسن؟
سه‌بری : ژبلی حه‌زکرنێ، حه‌زکرن مایه.
ریلکه : نه‌خوه، حه‌زکرنێ بپارێزن دا کو ژیان بهێته پارازتن.
سه‌بری : حه‌زکرن ژیانه.
ریلکه : و ژیان حه‌زکرنه.
سه‌بری : ئه‌رێ تۆ دزانی ئه‌ز چه‌ند ژ وێ حه‌ز دکم؟
ریلکه : ما قه‌ی حه‌زکرنێ پێدڤی ب مه‌ودا و راده‌یان هه‌یه دۆستۆ؟
سه‌بری : دبت نه‌بت. به‌لێ ئه‌ز باوه‌ر دکم کو مه‌ودا و راده‌یان پێدڤی ب حه‌زکرنێ هه‌یه.
ریلکه : چاوان تۆ ژ وێ حه‌ز دکی؟
سه‌بری : ئه‌ز نزانم چاوان... باوه‌ر بکه ژ سینۆران هه‌تا سینۆران، ژ هه‌سره‌تان هه‌تا هه‌سره‌تان، ژ غه‌ریبیێ هه‌تا غه‌ریبیێ، ژ ده‌ستپێکێ هه‌تا ده‌ستپێکێ ئه‌ز ژ وێ حه‌ز دکم.
ریلکه : و ئه‌و...؟
سه‌بری : ئه‌و ژ شوونواران هه‌تا شوونواران... ژ پایته‌ختان هه‌تا پایته‌ختان... ژ من هه‌تا من.
ریلکه : ئه‌رێ، تۆ بێژی حه‌زکرن چ بیت؟
سه‌بری : ژبلی ژیانێ، ما حه‌زکرن رامانه‌کا دی ددت؟
ریلکه : تۆ دزانی.
سه‌بری : بتنێ دزانم کو رۆژێ بیست و پێنج سه‌عه‌تان ئه‌ز هزرێن وێ دکم.
ریلکه : وه‌ختێ تۆ وێ دبینی، چ ب سه‌رێ ته دهێت؟
سه‌بری : پالا خوه ددم چیایێ... سه‌رتلێن من دگه‌هن که‌ماخێن ستێران... ئه‌ورێن سپی غه‌زه‌لێ ب مویێن سینگێ من دکن.
ریلکه : و ده‌مێ کو تۆ ل چاڤێن وێ دنێری؟
سه‌بری : خوه تێده دبینم... ئه‌م پێکڤه دکه‌نن، دگرین، دفرن و...!
ریلکه : به‌رده‌وام به!
سه‌بری : و دره‌قسن.
ریلکه : دبێژنه وێ ئازادی.
* * *
"ئه‌و که‌سێن باوه‌ری ب نیڤا دی نه‌هێن، من ئه‌و نه‌ڤێن. ئه‌و نیڤ ب پاره ناهێته دیتن. ئه‌و که‌سێن چیایێن چیمه‌نتۆیێ بلند دکن و دلێن ژبیرکری دبن ده دهێلن، وان های ژ چ هه‌یه؟ تف ل وان بت!" لۆرکا
سه‌بری : هنده‌ک که‌س هزر دکن کو ئه‌و نیڤا دی جارنا ژنه، جارنا ژی زه‌لامه.
ڵۆڕكا : هنده‌ک که‌س... مه‌به‌ستا ته "ئه‌ریستۆڤان" ه؟ [1]
سه‌بری : به‌لێ.
لۆرکا : ئه‌ز باوه‌ر دکم کو هه‌رتشتی نیڤه‌کا خوه هه‌یه.
سه‌بری ؛ هه‌رتشتی؟!
لۆرکا : ئه‌رێ. و دبت کو نیڤا دی یا مرۆڤی ژی هه‌ر تشته‌کێ دی بت.
سه‌بری : یه‌عنی چاوان؟
لۆرکا : یه‌عنی، دویر نینه کو نیڤه‌کا ته ژیان بت!
سه‌بری : یان ژی مرن بت؟
لۆرکا : ما فه‌رق چی یه؟ سارته‌رێ وه نه‌گۆت: "مرن دێمه‌کێ دی یه بۆ ژیانێ..."؟
سه‌بری : تۆ دبینی چاوان ژن و مرن و ژیان دگه‌هن هه‌ڤ؟
لۆرکا : ما ته باوه‌ری ب به‌رجه‌سته‌بوونێ هه‌یه؟
سه‌بری : نا. به‌لێ تۆ بێژی ژبلی "ن" تشته‌کێ دی هه‌ڤبه‌هر دناڤبه‌را وان ده هه‌یه؟
لۆرکا : سام.
سه‌بری :سام؟!
لۆرکا : به‌لێ. هه‌رسێ سامدارن.
سه‌بری : و هێژ...؟
لۆرکا : خوه‌شی ژی... هه‌رسێ خوه‌شن.
سه‌بری : به‌لێ جیهان تژی یه ژ ژن و مرن و ژیانێ.
لۆرکا : هه‌روه‌سان ئه‌م ژی. ئه‌م تژی نه ژ ژن و مرن و ژیانێ.
سه‌بری : هه‌تا کیژان راده‌یێ ته باوه‌ری ب نیڤا دی هه‌یه؟
لۆرکا : هه‌تا کیژان راده‌یێ نیڤا دی باوه‌ری ب من هه‌یه؟
سه‌بری : ئه‌و که‌سێن باوه‌ری ب نیڤا دی نه‌بن، من ئه‌و که‌س نه‌ڤێن.
لۆرکا : من ژی ئه‌و نه‌ڤێن.
سه‌بری : ئه‌و نیڤه ب پاره ناهێته کرین.
لۆرکا : ئه‌و نیڤه هه‌یه، به‌لێ ل کویڤه یه؟
سه‌بری : گرنگه ئه‌وه کو هه‌یه. لێگه‌ریان که‌فیله کو جهێ ناس بکت.
لۆرکا : تۆ بێژی وان که‌سان های ژ نیڤا دی هه‌یه؟
سه‌بری : نه‌خێر. هه‌گه‌ر های ژێ هه‌با، بنئاخ نه‌دکرن.
لۆرکا : بنئاخ؟!
سه‌بری : ساله‌هان ساله و دبن ئاخا ڤان وه‌لاتان ده، چه‌ندین دلێن شکه‌ستی خوه ڤه‌دقوتن؟
لۆرکا : و چه‌ند خه‌ون نیڤته‌مام هێلاتن؟
سه‌بری : و چه‌ند داستان گه‌ره‌که بهێنه نڤیسین؟
لۆرکا : و چه‌ند روایه‌ت گه‌ره‌که بهێنه ڤه‌گێران؟
سه‌بری : و چه‌ند گونه‌هـ گه‌ره‌که بهێنه غه‌فراندن؟
لۆرکا : و چه‌ند راستی هاتنه تیرۆرکرن؟
سه‌بری : و چه‌ند دره‌و به‌رده‌وامن؟
لۆرکا : و چه‌ند جاران من تف کره وان به‌لێ پێڤه ناچن؟!
* * *
"هینگێ که‌یفا وی هات، ده‌مێ کو ب دوماهیک هاتی" لۆته‌ریامۆن
سه‌بری : هندی ته ددیت دامایی و مه‌لویل بوو.
لۆته‌ریامۆن : راسته. به‌لێ ده‌م بۆ ده‌می کۆتره‌کا سپی ژ نهالێن دێمێ وی دفری.
سه‌بری : و هنده‌ک جاران شه‌وقه‌ک ژ چاڤێن وی ڤه‌ددا و سه‌رێن کۆلانێن باژێرێ ڤه‌مری رۆناهی دکرن.
لۆته‌ریامۆن : ئه‌و نه شه‌وقا چاڤێن وی بوو.
سه‌بری : نه‌خوه؟
لۆته‌ریامۆن : ئه‌و ته‌یفا مرۆڤه‌کا بده‌ستنڤێژ بوو د میحرابا چاڤێن وی ده دچوو سوجدێ.
سه‌بری : سوجدێ! بۆ کێ؟
لۆته‌ریامۆن : مرۆڤ نه ب تنێ بۆ خوه‌داوه‌ندان دچت سوجدێ دۆستۆ!
سه‌بری : وی چ دخوازت؟
لۆته‌ریامۆن : دخوازت ده‌ست پێ بکت... دخوازت هه‌موو مه‌سافاتان پڕ بکت!
سه‌بری : له‌ورا دگۆت :"ژ ده‌ستپێکێ هه‌تا ده‌ستپێکێ...".
لۆته‌ریامۆن : ئه‌رێ... ژ ده‌ستپێکێ هه‌تا ده‌ستپێکێ.
سه‌بری : تۆ بێژی هه‌رتشتی ده‌ستپیکه‌ک هه‌بت؟
لۆته‌ریامۆن : دبت. دوماهیکێ ژی ده‌ستپێک هه‌یه.
سه‌بری :به‌لێ ده‌ستپێکێ ژی دوماهیک هه‌یه.
لۆته‌ریامۆن : راسته، به‌لێ ده‌مێ گه‌هشتی دوماهیکێ ژ نوی که‌یفا وی هات.
سه‌بری : یه‌عنی هه‌ر که‌یفا وی هات؟
لۆته‌ریامۆن : ئه‌رێ. به‌لێ ئه‌و ب خوه ژی د دوماهی هات.
* * *
" وه‌غه‌رێ دکت
ژ پێنگاڤێن خوه ده‌ردکه‌ڤت و
به‌ر ب خه‌ونا خوه دچت
ئاقل وی رادوه‌ستینت و
ئه‌زموون وی دهه‌تکینت
پێڤه‌ناچت و به‌رده‌وام دبت
ده‌رگه‌هێ خوه دگرت
نه‌کو دا خوه‌شیێن خوه زندان بکت
به‌لێ دا کو ئازارێن خوه ئازاد بکت
خوه‌لییا وی ئاگری رادوه‌ستینت و
ئاگرێ وی ژی ده‌می رادوه‌ستینت" ئه‌دۆنیس
سه‌بری : ما قه‌ی نا وه‌ستیت؟
ئه‌دۆنیس : مرۆڤ ژ هه‌رتشتی دوه‌ستت، ب تنێ ره‌ڤ نه‌بیت.
سه‌بری : ئه‌و ژ چی دره‌ڤی؟
ئه‌دۆنیس : ژ خوه.
سه‌بری : ژ خوه دره‌ڤی! چاوان؟
ئه‌دۆنیس : هه‌ر پێنگاڤه‌ک په‌شێمانییه‌ک بوو، هه‌ر پینگاڤه‌ک سینۆره‌ک دبه‌زاند، هه‌ر پینگاڤه‌کێ "ئه‌زه‌ک" ل په‌ی خوه دهێلا، هه‌ر پینگاڤه‌کێ رێکه‌ک دگرت و ئێکه دی ڤه‌دکر.
سه‌بری : کویڤه دچوو؟
ئه‌دۆنیس : به‌ر ب خه‌ونا خوه دچوو.
سه‌بری : چو جار نه رادوه‌ستیا؟
ئه‌دۆنیس : نه‌خێر. ئاڤامه‌زن رادوه‌ستیا و ئه‌و رانه‌دوه‌ستیا. ئاقلێ وی رادوه‌ستیا و ئه‌زموونا وی ئه‌و هان ددا، پێڤه نه‌دچوو، به‌رده‌وام دبوو چونکی باوه‌ری ب دوماهیکان نه‌بوو.
سه‌بری : به‌لێ هنده‌ک جاران دگۆت ئه‌ز با مه، ئاخم، ئاگرم. با و ئاخ و ئاگر ل هه‌ر درێ هه‌یه.
ئه‌دۆنیس : مه‌رج نینه جهێ با و ئاخ و ئاگر لێ هه‌بیت، خه‌ون ژی لێ هه‌بیت.
سه‌بری : خه‌ون چی یه؟
ئه‌دۆنیس : ده‌رگه‌هێ روحێ یه.
سه‌بری : روح چی یه؟
ئه‌دۆنیس : چو که‌سێ ل پشت ده‌رگه‌هان بکه‌ڤیت دێ کا زانیت روح چی یه.
سه‌بری : به‌لێ وی هه‌رده‌م ده‌رگه‌هێ خوه دگرت.
ئه‌دۆنیس : دا کو ئازارێن خوه ئازاد بکت...
سه‌بری : ما نه سه‌یره مرۆڤ تێرا هه‌موویان بکت: روح، ئازار، خه‌ون، با، ئاخ و ئاگر؟
ئه‌دۆنیس : ما نه سه‌یره ژی کو ئه‌و هه‌موو تێرا مرۆڤی ناکن؟
سه‌بری : ل ناڤ خوه دگه‌ریا؟
ئه‌دۆنیس : ئه‌رێ. ده‌رگه‌هـ ل خوه دگرت و ده‌ست ب لیگه‌ریانێ دکر. جهـ و زه‌مان هه‌می ده‌رباز دکرن به‌لێ نه ددیت.
سه‌بری : چ نه‌ددیت؟
ئه‌دۆنیس : خوه!
